ZU BERRIRO

Gauak dena berdintzen duenean

askeago sentitzen naiz.

Horregatik nahi nuke

ilberriko gauetan bizi,

ikusteko itsuek ikusten duten moduan,

atseden hartzeko gure haurra lo dagoen ohe berean,

elkar maite dutenek egiten duten eran

nire beso artean

zu berriro biltzeko

gauaren babesean.

Gauak dena berdintzen duenean

askeago sentitzen naiz.

Horregatik maite ditut

kandelen su dardartiak,

jakin dezazun hortxe nagoela

zure begien aurrean,

harresiaren alderen batean,

zementuz egindako oskolaren zainetan,

zure altzoan,

gauaren ebakiondoan.

Gauak dena berdintzen duenean

askeago sentitzen naiz.

Horregatik astinduko ditut

armiarma-sarean itsatsi zaizkidan oroitza meheak,

elkar maite dutenek egiten duten moduan

nire besoen artean

zu berriro biltzeko

harresirik gabeko ilargitan,

herri askearen izarretan.