SUGEAK DANTZAN

Sugeak dantzan dabiltza

su goriaren inguruan

saguzarrekin baltseoan

ilunabarrarekin larrutan

izarrak keinuka ari direnean

Zeru osoa hautsi da

gure buruen gainean

Haurrek jolasean

ostikoz jotzen dute ilargia

kristal pusketen antzera

Ileak erre zaizkigu

ametsak izatean

sudurretik odoletan

hasi ginenean bezala

tanta gorriak

komuneko zoru zurian

Gaztelu eskoziarretako

arima errariak baikinen

bakardadearen gerran

izuaren konpainiarekin

norabiderik gabe

alde egiten duen iheslaria

Gaueko izar urduriek

pausoak estutzen dizkiote

egun argiz berriz

ez du babesteko itzalik

Begiratu oskarbian

nola astintzen duen aireak garia

Zalantza izua eta pasio setatiek

aztoratzen gaituztenean

gari garauak sentituko gara

jakin arren bizitzaren zaparrada

arratsa orduko ailegatuko dela egunero

Muino laranjak iluntzean...

lore sikuen gisa hautsiko gara

denboraren orri artean