LILLOT ERREGINA

«Gezurrak emendaturiko artistak,

sentimenduen maiseatzaile miserableak!

Lillot erregina eta bere hamaika maitaleak

amodiotan ari ziren gau amaigabean».

Tristeziaz beterik xuxurlatzen zituen

Karim Bensaidek kolore lizuneko hitzak

Paris-Lyon joan-etorria etengabean

egiten duen bagoi gorrixka batean.

«Dokumentu gabe ibiltzen zen karrikan

batere beldurrik gabe, gauak hirian

farola nagiak piztu bitartean».

Autobus txofer eta periferiako taxistek

aspalditik ezagutzen zuten Lillot erregina,

Lyongo dentista baten alaba.

Baina haren paperak inork ez zituen

zehazki inoiz ezagutu,

gerra osteko ahanzturak irentsi zituen

Marseillako polizia-etxean

enbaxada atzerritar bateko

agregatuarekin harrapatu zutenean.

Harrezkero ez da inon ageri Lillot erregina.

Batzuek uste dute oraino Marseillan bizi dela

baina aspaldian inork ez du haren berririk.

Azkenengoz Alexandrian ikusi zutela diote,

zurrumurruak besterik ez dira.

Hauxe da oroitzen dugun bakarra:

«Lillot erregina eta bere hamaika maitaleak

amodiotan ari ziren gau amaigabean»

ordularietan oinazea lokartu zen arte.