LANGILEAK

Pattarrak goldaturiko zintzurren antzera

        eskuak garraztuak dituzten obra gizonek

ez diete gehiegizko arretarik jartzen

        eguzkiak zenbatzen dituen urtaro aldaketei,

udazkeneko hosto eroriek grabitatearen

        legearekin izan dituzten harremanei buruz

txindurri beltzaranak esan ditzakeenez beste.

Beren atzera-aurreretan zentratzen dira,

        erlojuetako hortzak eta orratzak bailiran

errotazio eta zirkularitate etengabeetan,

        diruaren joan-etorri eta beharrizanak aparte

bizitzan bestelako funtzio eta utilitaterik

        ez balu bezala haien existentzialitateak,

berauen aurpegien zimurretan leitu ahalko

        balira bezala jardun filosofiko sakonenak

ispilu aurrean lanera orduko bizarra egitean.