MUTU DIRAUTE

Mutu diraute telefonoek

maitaleen gau ilunean.

Urtu egin dira izebergak

tximinoak munduaz jabetzean.

Pailazo aurpegiak lurrera erori arren

mutu diraute lekukoek

arrain begiz harriturik.

Esku gabeko figura grekoekin

solasean dihardute amets mutanteek

oxigeno faltaren zorabioaz eztabaidan.

Minotauro bisaiaz, akiturik,

ilusioak birrindu zaizkio Sokratesi.

Zotinka eta marmarka sumatzen zaio:

«Maitaleen ezpainak pozoitu dituzte

amodioa akabatu nahian».

—Ez al dituzu haurren irrietan

sagarrondo zuriak ikusten?

—Asfaltatu egin berri dituzte

sentimenaren bide galduak.

—Oraintxe entzun dut irratian

kontrolak ezarri dituztela bidegurutzeetan.

Eta zu ikusten zaitudanean

barrenak eztanda egiten dit,

mutu gelditzen naiz

zenbat maite zaitudan

adierazi ezinik, lotsaturik,

disimulatu nahian,

lurrean zerbaiten bila dabiltzan

haurren papera antzezten.