HARI ZURIA

Urte histuen buruan

zer egin ez dakizula egonez gero,

zure begiratu berdea higaturik edukiz gero,

lotu ezazu ateko sarrailan hari zuri bat

eta abiatu zaitez jaberik gabeko basoetara,

murgildu zaitez zetazeoen itsas bareetan,

egin ezazu hegan gezurren gaineko altueretan,

begira adi-adi inoiz menperatuko ez duzun munduari,

entzun ezazu sumendi ortodoxoen min samina,

arnastu bakardadearen atmosfera,

jo ezazu eguzkiak punitutako ordokietara

eta han kausituko nauzu,

zure zain edo zure bila egongo naiz

eta apurtzeko ordua iritsiko zaio hari zuri horri.