Hiria - Lau

 

Berunezko odolen ibilguak eta ur-arratoien

kausaz hondoa jotako taxiak dituen hiria

tronpeta jotzaileak falta-epaiketetan adituak

eta hiri murgilduaren izuaren aurrean

itzul bedi atzerritarra bere aberri aukerakora

                                                                memoriara

 

itzulera bidaia luzea akabatzen zaituena

ur zikinezko labarretatik barna

putzu ikaragarrietara leize

itsuetara non bizi baitira depresioa

                                                  heriotza

tentazioa eta ezerezaren oroitzapen atabikoa

zulo beltzak eta materia iluna

 

heriotza izanen ahal da denboraren aintziran jaustea

zeruko lerroetan bizi izandako hiriak

agur dudazko kantoiei

                                larru

aproposei errukiaren siluetak

jada kontsolatzen ez duten jakintzen geometria

txalupan urrutiratzen dira bizi izandako izakiak

 

ohikoa zaie naufragioa errespetuz begiratzen dute

itota hiltzen delako ebidentzia

jada ez zara geratzen den bidaiaren parte

agur maitea

                 irudi du atzo izan zela bizitza

 

azken amildegiak estonatua eta arindua

beste aintzira aurpegi begi batzuk espero dituzu

uraren eta heriotzaren arteko ertzera agertzen

haiek beren denboraren bila doaz

ezin izango dituzu ikusi naufragioak dituztenean

eta desio ez dizkiezun txalupetatik erortzen direnean

hondorik gabeko olioen aintzira honetara bertara

 

zure bizitzaz haratago babesgabe mugarik ez duen

desioa bizi den hiria bilatzen duzu

murgilduta dauden teilatuak oinekin ukitzen

dituzun bitartean non zure hildakoak bizi baitira

lohiaren eta landare madarikatuen substantzia dira

aintzira itzuri ezinaren olio astunak kulunkatuak

a zer ikara geldo leize-zulo sakonena

non alderrai flotatuz baitabiltza itsurik tristeenak

alferrik da zu anfibio gogoratzea

ez da behar ezin da ez da jakiten ez da itzultzen

zorrak ordainduta hildakoak lurperatuta

hiri ikaragarriaren hondora iritsi da

bela zuriz eta adar berdez beteriko oliozko aintziraren

                                                                             amaiera

 

txantxangorriak abenduan kantatzen du

udaberrian bezala

bioletak loratu dira

hiltzen ari bada ere

zuk badakizu zergatik maitea?

 

eta hondotik hasieretara

lehengaiaren hirira

jatorri ilunera

joango balitz ba ote da jatorririk?

                                                geometrikoa al da?

errukia? kontsolamendua?

izarren baten erabaki hotza

edo bakterio mortu baten harria?

 

materia iluna teoria da

edo erdigune karroindatuen poesia

non lurra bere baitan biltzen baita

zatiki exotikoen detektagailuek

lurraren zentroa zulatzen dute

non bizi baita jatorrizko hiria

hasierako galaxien arkeologia

 

meategi agortuen leizeetan

izpi kosmonautetatik haratago

bihozgabeek erregistroak kutsatzen dituzte

berun urtuak sator-gizona babesten du

ihes egin baitu kadmio

politileno germanio aberastuaren zulotik

jatorrizkoaren detektagailuak Kausa Handia

Esne Bidearen materia iluna

 

oraindik identifikatu gabeko masa horrek

kosmosez egindakoak kosmosa sortu zuen

izan izar nanoak eta marroiak

izan zulo beltzak edo substantziarik gabeko

neutrinoak materia ilunen izterbegi seguruak

ahul jarduten duten partikula masiboak

horrelakoa izanen da unibertso primitiboa

edo horrelakoa izan zen denborak itzultzen

direnean ezerez biguneranzko bidaia perbertsotik

ikusezinak izanen al dira lehen partikulak

aura bat bezala atxikiak hiri zehatzari

kosmosetik zehar badoan beste aberri bidaiari bat

geroratzen duena bi zeroren arteko

bidaia batean bizitzaren katastrofea eta herstura?

                                                                        izanen da

txori baten aztarna elefante geldoen

xendra batean identifikatzea bezala

beta desintegrazio bikoitzaren zain

ez dena oso gertagarria erakutsiko lukeelako

neutrinoak ez duela masarik ez etorkizunik ere

 

arazo latza materia ilunarena

jatorriaren presentzia ikusezina inoreztatzailea

eta inoreztatua ahanztura beharrezko bat bezala

hirien pertsonen eta gauzen

ertzetako konbentzioa eta muga geometriko

funtsezkoak onartu ahal izateko

iluntasun horretan ezerezaren harrokeriak

aurrez egindako bekatuaren

susmoaren itzala kabitzen da

 

baina lepokorik gabe galdutako

animalien gainean

lepo eta guzti galdutako

gizonak daude eta gaua dago

heriotzaren aldi baterako maiestate

esku-argiek islagailuek arima-argiek

ozta-ozta zerbitzatzen dute

artifiziozko bala bigunak

argi beldurtuak sastrakaren aurka

 

Jainkoaren hiria Deabruaren hiria

kosmoseko edo munduko biztanlea

naturakoa izan edo Historiakoa

Erroma paganokoa edo zeruko Jerusalemgoa

kasualitatea hiri aukeratukoa izatea

aukeratuen morroi-samaldakoa

                                             hiri bat

santuen edo errudunen komunio bat da

                                                         istant bat

gertatu dena edo gertatuko dena memoria eta desioa

                                                                             hiri bat

filosofoena hiritarrena santuena

egia absolututik ihes egin dutenena

                                                   edo Itxaropen zelatatua

 

O etorkizuneko hiria O jakintsuen hiria

ez da izango hiri beharrezkorik profetarik gabe.