Gehiegi zekien gizona

 

“Haientzat zenbaki bat

arrazoi bat baino ez zen”.

Birkhoff & MacLane,
Algebra Modernoa

 

Isila, altua, meharra, zuria

gogora zaitezte ongiaren eta gaizkiaren

zientzia misteriotsua zekien lagunaz

baldintza objektiboen haitzurdinezko kodearen pean

eta tranbiako langile galiziar baten

eta Tranbien Konpainia zoragarriaren

                                                     arteko

diferentzien interpretazio dialektikoaren pean,

 

                                                  maitasuna deklaratu zion

arrazionalki, baldintza objektiboen analisi hotzaren ondoren

neskatxa bati, beste garai batean gauza zena

porturaino alderrai joateko gauez

eta urari beha egoteko antzeman gabe

ura desinfektatzeko behar zen kloro-kopuru zehatza

                                                                           haren eskutik

neskatxak ikasi zuen objektibotasunaren agindu

etengabearen arabera jokatzen

eta elkarrekin ekin zioten maitasunaren bide gogorrari

kontraesan subjektiboak ezabatzen dituen gertaera bat

zelakoan

oligarkia finantzarioen mendeko jendarte klasistaren

estimuluen perbertsioari aurre egiten dion

kontzientzia baten desordena

misteriotsuak

kontzentraziorako jaidurak objektiboki baldintzatutako

oligarkiak, bestalde

kapitalismoaren fase agoniko saihetsezinari dagokiona

eta gainera

“bi idealen baturak interpretazio

geometriko erraza duelako” (Algebra Modernoa -
Birkhoff eta MacLane)

 

                                eta egun txar batez

haren hitzak gaizki interpretatu zirelarik, joan behar izan zuen

urrutiko lurretara neskatxa ikasiarekin

aditua baitzen mozkor malenkoniatsuen

koordenatuak marrazten

                                   zeren

elikadura txarrak eta iodo faltak

gizona malenkoniara eramaten baitute

 

                                                        eta joatean

maite tristea zoritxarrean itorik, bisaia

itzuli zuen Loten emaztearen antzera eta

                                                           ikusi zuen

                                                           uzten zuen lurra

eta lur horren arazoak iraultza liberala oraindik

egin ez duen herrialde azpigaratu baten

isla zehatza ziren. Eta pozik joan zen bazekizkielako

joan beharraren arrazoiak

                                     eta objektiboki demostratua geratzen zelako

                                     kontraesanak zorrozten ari zirela

eta gainera

 

“integritate-domeinu ezagunenetan,

ideal guztiek oinarri finitua baitute,

baina badira domeinuak zeinetan ez baita hala”

 

Algebra Modernoa - Birkohff & MacLane.