Agian egia da

dialektika eternoa dela

historikoa baldin bada

                                eta kontraesana

egiten dela edo sortzen dela gizakien desioaz

 

                                                                behin

ordenagailuak lan-banaketa konpondurik

langileek klase borroka lagako dute eta hori ez ezik

langile izateari ere utziko diote

 

behin

disuasio energetikoak

nazioarteko lan-banaketa konpondurik

                                                        kolonizatuak

ez dira deskolonizatuko eta hori ez ezik

kolonizatuak izateari utziko diote

 

                                               behin

nazioarteko klase borroka

elkarrekiko disuasioak konpondurik

                                                   munduko iraultza

ez da izango berez iraultza bat eta hori ez ezik

mundukoa izateari utziko dio

 

                                          XXI. Mende On

zeinean bost mila milioik posatuko baituzue

Historiaren Amaiera videotype

                                            kolektibo batean

 

baina argazki-kameraren jabeak

erretinan gordeko zaituzte

                                     faktura pasatuko du

eta ezin ordainduko diozue laserrezko lepokoekin

ezta azukrerik gabeko paradisu-pilulekin ere

 

Nikonaren jabeak zuen keinua edukiko du

eta mendea gautu baino lehen

                                           askatasunaren eta klase borrokaren

profetak beharko dituzue

 

sar itzazue hormarik gabeko eroetxeetan

                                                          eta ihes egiten badute

hotzez hil daitezela

                           galaxiarik txarrenen ateetan abandonaturik