Eder denaren gorazarrea

Zure sorbaldak,

harkaitz gogor harroak.

Nire adatsa bertan isurika

argi-turrusta baten antzean.

Zure sorbaldak,

gotorleku baten hormak.

Nire ile-korda bertan dantzan

sahatsa legez haizetan.

Zure sorbaldak,

burdinazko dorreak,

odol biziaren isla itsugarri,

txingar-ontzien kobrea.

Desiraren tenplu mutuan

zure alboan natza, artega.

Nire musuen markak sorbaldetan,

suge-xixtada garratzak. 

Zure sorbaldak,

mendi-tontorrak dizdizka

eki-ekaitz kiskalgarrian,

izerdi tanten azpian.

Zure sorbaldak,

begi irrikatsuon miragunea.

Zure sorbaldak,

nire erreguen otoitz-harria.