Egun on esango diot eguzkiari

Egun on esango diot eguzkiari berriro,

nire baitan ibili zebilen ibaiari,

nire betibateko pentsamenduek eratzen zituzten hodeiei,

urtaro lehorrak nirekin batera zeharkatzen zituzten

lorategiko makalen haziera nekosoari,

gaueko zelaien usaina opatzen zidan beleen hegaldiari,

neure amari, ispiluan bizi

eta neure zahartzaroaren geroa zenari,

eta lurrari, atsegin-goseak betetzen baitzion

hazi berdez sabel dardartia.

Etorriko naiz, etorriko naiz, etorriko naiz

lurpeko lurrinez mela ile-adatsa,

hormaz bestaldeko basoan batutako zuhaixkekin

izandako iluntasunaren eskarmentu zolia begietan.

Etorriko naiz, etorriko naiz, etorriko naiz

eta maitasunak blaituko du ataria

eta egun on esango diet maitaleei berriro

eta artean ere hor den neskatxari,

maitasunak blaitutako atarian,

egun on esango diot berriro.