Izerdia

Japoniako noh teatroan aktoreak egindako lana ikusleari gustatu bazaio, berarengana hurbildu eta zera esaten zaio, “gaur gustatu zait zure lana, gaur izerdia bota duzu”.

      Eszenan lan egiteak esfortzu fisiko eta mental handia exijitzen du. Gorputzak adi egon behar du ehuneko ehunean. Kontzientzia garbiarekin atera behar da eszenara, eta argitasunarekin. Beti ez da hala izaten, baina nahi eta nahi ez ekintza guztiak gauzatzeko gorputza martxan jarri behar da. Mekanika horrek esfortzu bat exijitzen du. Esfortzu hori ahotsean ere ematen da, ez baitugu egunerokotasunean erabiltzen dugun ahots erregistro berbera erabiltzen. Publikoarengana iristeko ahotsa eta gorputza zabaldu, dilatatu egin behar dira. Horregatik da normalena aktoreak izerdia botatzea.

      Imajinatzen ahal duzu izerdirik botatzen ez duen futbol jokalaririk? Seguru egon, horrela bada, ez duela inoiz partidurik irabaziko.