Estrategia

Helburu bat lortzeko aukeratzen dituzun bide ezberdinak dira estrategiak. Bizitzan ere erabiltzen ditugu. Lagun bat konbentzitu behar dut nirekin festa batera etortzeko, esate baterako. Mila modutara eskatu ahal diozu, negarrez, erregutuz, mehatxatuz, hitz maitagarriz, bere hobe beharrez dela esanez… Bada lanketa honi esaten zaio estrategiak bilatzea.

      Ekintza bat egiteko orduan ere berdin egin daiteke. Hau da, gauza bat modu ezberdin askotara konta daiteke. Horregatik da interesgarria estrategiak bilatzea, iaiotasunez eta trebetasunez egoerari aurre egin eta beste ekintza batzuk planteatzea. Kontrasteak eta kontrapuntuak beti aberastuko du eszena.

      Eta kontrastearen eta kontrapuntuaren ildotik tiraka, sarritan talde dinamiketan gertatzen den arazo bat aipatuko dut. Elkar kutsatzearena. Argi dago taldean egin behar dela lan, baina ez dugu ahaztu behar taldea norbanakoek osatzen dutela. Taldea eramateko bakoitzak bere ardura dauka, eta adi egon behar zara taldearen dinamika hautsi gabe, taldean barnean kontrastea eta kontrapuntua bilatzen. Estrategia berriak eskaintzen. Horrela, proposatutako jokoak geruza eta kolore gehiago hartuko ditu.