EMAKUME KATUDUNA

 

 

Katuek erpeka eraitsi dute zuk landaturiko glizinia:

ez zintuzten ezagutu.

 

Altzora datorkit Charlotte anbar-begia.

Udako itsasoan ahoan kosk egiten nizunean,

halakoak ziren zure niniak.

Bizitzaren alde sinatzea izan zen pasio hura.

 

Emily lo dago lastozko kapela gainean.

Zurruka ari da. Ulertzen duzu?

Antzekoa zen zure urruma nire lepoan.

Zenbat zin-berba patuaren kontra.

 

Anne hara eta hona dabil, beti bere kasa.

Jolasteko ordua da, diost, kinu eginda,

zuk lez, gona altxatzen zenidanean palmondopean.

Nola likidatu kalteengatiko kexak.

 

Hemen naukazu,

fereka-txandan hiru katuokin

eta denborari joaten uzten

berriz dantzara atera barik, uger egin barik

irlaraino, trikimailurik asmatu barik

zu Hiperborean kartzelatzeko.

 

Aspaldi esan nuen beste bat ari nintzela bilakatzen.

Ez al zen egia?