ELDARNIOA

 

 

                    HAMAIKAK

 

Asteriskoak, ikusezinak testuan,

oroitzapenei dagozkie,

pisua duen zerbaiti, distiradun zerbaiti,

ilaunaren azpian izan ohi den zilarrari.

 

 

                 HAMABIAK

 

Soinuak ur-deposituan,

oihartzunak lodituriko gurgurrak:

ilea flotean ni, azala berdexka,

tinta-korrokadak aho tenkatuan.

 

 

                 ORDU BATA

 

Orbela karga-igogailu batean,

kateorratzak bularrean.

Orbainei eta erredurei harramazka,

eromena zelatan.

 

 

                 ORDU BAT ETA LAURDENAK

 

Gero,

lizunezko ziklamen bat bezala.

Gero,

arrosa herdoildu bat bezala.

Gero,

burdin harizko jasmina bezala.

Gero,

orkidea koipetsu bat bezala.

Gero,

igebelar kedartuak bezala.

 

Leher egin, eta tresnak eta zentzumenak nahasi.

 

Bentosa, burmuina, gontza, tinpanoa, torlojua, begia, mailua, azala, birabarkia, mihia, lima, eztarria.

 

Sutautsa magalean.

 

 

                 ORDU BIAK

 

Izara mailukatu oinekin.

Ur-errota baten besoek legez

minutuak, segundoak, orduak

iraulkatu.

 

 

                 HIRURAK HAMAR GUTXI

 

Erresistentzia:

Ignatia Amara, ora pro nobis.

Nux Vomica, ora pro nobis

Arsenicum Album, ora pro nobis.

 

 

                 LAURAK ETA HOGEITA ZAZPI

 

Baina denboraren ifrentzuan

denbora besterik ez dago,

hutsik egotea funts duen gaua,

itzal bihurtzen nauen mututasuna.

 

 

                 BOSTAK

 

Ez, ez dago hutsik ilunbeltza;

ezpadaze kreaturaz beterik.

Zaldi beltza dator errezel ostetik,

Henry Fuseli-ren amesgaiztoa.

 

 

                 SEI ETA ERDIAK

 

Ohean natza, teatralki:

deabru batek azpian hartuta nauka.

Ezerezera nahi nuke lerratu,

aldikada hau saihesteagatik.

 

 

                 ZAZPIAK

 

Ezpainetan kilkerrak ekartzen zizkidanak

eman zidan agindua: “Dramarik ez”.

Sonogramarik tiranoena.

Horregatik bihurtu nuen lastozko irudi.