ITURRIA

 

 

Zoritxarrekoa bere baitan itzalik ez duena.

Arto Melleri

 

 

Zoritxarrekoa bere baitan itzalik ez duena

ez baitu adituko fruta-arbolen lorea,

patuaren laburra iragartzen duen hizkera.

 

Zoritxarrekoa bere baitan zulorik ez duena

ez du-eta haztatuko izenean ostentzen duen haitza.

 

Zoritxarrekoa bere baitan mantarrik ez duena

biluzik egongo baita banitatearen banketeetan.

 

Zoritxarrekoa amaraunik ez duena

ez dituelako aski izango bere bi metro azalak

izarpean denda bat altxatzeko.

 

Zoritxarrekoa bere baitan segarik ez duena

edo igitairik edota labana arruntik

ezingo baitu eten txera txepelen amarra faltsua.

 

Zoritxarrekoa basamortu txatalik ez duena

ziri-mapetan bilatuko baititu zerumugaren begiak.

 

Zoritxarrekoa bere baitan lubakirik ez duena

ezen, unearen ardoarekin topa egin arren,

ezingo baitu busti desafio puskatuen jasak.

 

Zoritxarrekoa bere baitan hondakindegirik ez duena

ez duelako aurkituko

ez itzal ez zulo ez mantar ez amaraun

ez sega ez basamortu ez lubaki

are baitarago iturri bat duela berretsiko dionik.