NAIF IKUSPEGIA

 

 

            A

 

Buruko mina.

Hamahiru urte eta ezti-begiak.

 

Buruko mina.

Bazen zer edo zer, kanpora atera nahi zuena.

 

 

            BE

 

Goiza zartatu egin zen:

aita eta biok plazako petrilean.

Langarraren zunburruna.

Ezabatu egin zen udaberria.

 

Bai, beltza zen jada.

 

 

            ZE

 

Amak negar egiten zuen

eta gauzak erosten zizkidan.

Besteak beste, ile-orratz bat

adornu batekin:

neskatxo bat lo ilgoraren igitaian.

 

 

            DE

 

Kontua ez zen erabat gaizki joan.

 

Ez nuen itxurarik egin behar izan,

ez neukan ia konplexurik.

 

 

            E

 

Begi horrek, hala ere, ez nau askatzen.

Bilduki zuen kotoia lardaskatuz doa.

 

 

            EFE

 

Behin eta berriz,

behin eta berriz,

bisturiarentzat

nire aurpegia.