BEGI GORI BATENTZAKO LO-KANTA
HOGEITA ZAZPI HAIKUTAN, MORE OR LESS

 

 

Gau logabea:

betazaletan orratz

argi mehea.

 

Asteroide bat

begi-zulo zuloan

din-dan boleran.

 

Dena bat beti:

mina minari deika

gizon aurpegiz.

 

Ohatze hutsa.

Musu haien aztarnan

pil-pil mamutxak.

 

Andre hautsia,

eskuin begia erne,

txori geldia.

 

Laztan zauria:

goiz-alban horren ertzak,

pazko gorria.

 

Gorputza guri:

bularretik ihesi

bi ipurtargi.

 

Brisararentzat,

suturaren josturak,

parpaila zutak.

 

Egunsentia.

Perla more odoldua

zure ninia.

 

Berriz galdua

zure ezker begia?

Lelokeria.

 

Tramadol, erdu.

Patxoa, kortisona.

Jantzi hegal onak.

 

Tximeletari

ez zaio egun bat aski.

Itxaron zazpi.

 

Etxea isilik.

Paper mututuari

arkatzak zirri.

 

Liliumen hautsa:

urrezko betileak

mahaian pausa.

 

Nora ote doaz

kalatxori hiritarrak?

Teilek dardara.

 

Euri eta euri.

Azalearen hotsak

tristura ateri.

 

Orain haizea:

gurma artean kantua

kurkuiluena.

 

Ez da mundua;

bakartze alu hau duzu

bide galdua.

 

Hotza, bai, hotza,

kolkora batu duzun

adio-poltsa.

 

Ai, pago makur!

Ustela enborra eta

orriek agur.

 

Luma urdinak.

Gorde da oskilasoa.

Negar basoak.

 

Errepikatu:

“Itzala ortzimugara

ez da hedatu”.

 

Badoa eguna,

bekain bien zubia

zeharkatuta.

 

Gordin izarrak.

Bisutsak estaliak

urrats zaharrak.

 

Oinazturia.

Pupuan trapua eta

olio horia.

 

Lo-lo, umea.

Goxatuko zaizkizu

mailatuneak.

 

Ikomelautxu,

mihura atean duzu.

Aleluia zu.