EXORZISMOA

 

 

Orbain bat ez da adar hil eta ahaztua.

Sholeh Wolpe

 

 

Okaranak belar artera jausten

partitura bati obedituz bezala.

 

Zuhaitzak aske uzten du umo dagoena:

adarra ez da jada fruituaren lekua.

 

Gu, hala ere, tematzen gara lotzen

amodioari amodioaren oroitza.

 

Itsasoa ertzean argiagoa den legez,

ez dute tindu bera minak eta orbainak.

 

Zelaian algaraka, okaran-janean,

A. laguna eta biok sonetoak leitzen

 

eta fruitu-hezurrak indarrez part egiten.

Mamuak alagala akabatzeko balak.