METEORITOA
Zaborrean astraka ari zareten bitartean
belarra zapaltzen duzue konturatu barik.
Ikusten zaituztet, bai,
ni ere hala nabilelako.
Elkar hartuko bagenu eta gutxiago sufritu
urrearen edo egun erabiltzen den patroiaren erruz,
guardia egingo bagenu
batzuk orain, beste batzuk gero,
eta oihuka ari direnei lagundu eta
ondoren haiek guri,
eta abiatuko bagina laino hau aldean
baina berba argiekin beraien bila,
gure ikaspenen aurka ulertuko bagenu
erabaki bat ez dela gauza pertsonal bat,
beharbada, nork daki,
zuloetan sartuko ginateke
goizak ohi duen bezala.
Zoro batek esan zigun hau.
Baldintzarik gabe jarraitu genion.
© Igor Estankona