ABERDEEN URDINDUTIK
Granitozko ondo etorri hau errefusatzen dut
ikusi zintudan azken aldiaz gogoratzen naizenean;
hilkutxa bat erori, pitzatu, eta zu atera zinen hegan.
Sua egin genuen harea multzoekin,
batzuetan gaztelu bat eginez eta zelan erretzen zen ikusiz,
besteetan bihotz bat landuz eta zelan desegiten zen frogatuz.
Itsasgorak ezabatu egin gintuen,
berdindu egin zituen harea multzoak eta
egurrezko zutabe geratu naiz urazalean.
Apur nazazu, mozkor gaitezen argiaz,
zoaz olatuetan gora dantzan,
badakit-eta nekatzen zarenean,
itota itzuliko zaituztela.
© Igor Estankona