KANPOAN
Larrosa baten ostean, pinuen azpian,
ibaiak itsasoari ateetaraino laguntzen dion lekutik
hurbil, etxe bat.
Perfume eta botiken botila txikiak
pilatu eta fintzen ditu urak:
ez daki besterik egiten,
baina bikaina da lan isil horretan.
Bat-batean argia piztu da etxean
eta ez dauka ez abisu ez gonbidapen itxurarik:
silueta bat baino ez.
Badakit ez dudala leku hoberik aurkituko,
ez dagoela leku hoberik munduan
haizeak desegindako ohe heze hau baino
izarren azpian. Ilargia gaua irabiatzen.
© Igor Estankona