ASKOZ BIZIAGO
Gogoan dut nire etorkizuna besapean hartuta
joan zinen eguna.
Garai hartan
askoz biziago zeunden zu odoletan ni dantzan baino.
Itzultzeko eskatzen nizun gutun guztietan,
baina nekatuta idazteari utzi nionean itzuli zinen.
Niri berdin zitzaidan jadanik
ez nuen ezagutzen besapean zenekarrena.
Eta XVII. mendeko gure elizetan bikoteek
elkarri begiratzen zioten urruntasunaz
begiratu genion elkarri.
Askoz biziago nengoen ni odoletan zu dantzan baino.
Denak azulez zihoazen,
zu grisez.
© Igor Estankona