NEURRIAK ETA IZENAK
Armairu bat eraman nahi zuten
gela batetik bestera,
baina ez zen atetik kabitzen.
Elkarri ezer esan barik,
armairuaren kristalezko ateak zabaldu
eta barruko erretiluak, platerak,
kopak, kikarak... ateratzen hasi ziren.
Hustu zutenean eta
ateak berriro itxi,
armairua arazo barik
pasatu ahal izan zuten.
Trapu banarekin
hautsa kendu zieten ontziei,
lehen zeuden bezala kokatzeko gero.
© Igor Estankona