MUSUA ZIRKULUAREN ERDIAN
Jendeak zioen bat-batean
zabaltzen diren pertsianen senide zirela.
Jendeak zioen
arrazoia zeukatela harriek, pozik,
geranio beltz haiek baimendu zituztenean
bi nerabek elkar besarkatu zuten lekuaren inguruan.
Gertatutakoaz galdetzean, erantzun zuten
maitasunaren unean zeruak buelta eman zuela
poltsa baten barruan, eta norbaitek,
emeki, gorputzak amaitu zizkiela.
© Igor Estankona