Eta dena jakina zaigunean,

elkarrizketa guztiak

ezagunak zaizkigunean,

barre algara guztien makinaria

aztertua dugunean,

milaka aldiz entzundako

gaurko hitzen pisu astunak

mundua are gogaikarriagoa

bihurtzen duenean,

ez dago beste zereginik:

isilik egotea,

ardo on bat dastatzea

eta puruaren kea urrun jaurtitzea,

oroimenak hurbil dakizkizun

bere begiradaren aire urdinean.