Goseak janak
Goseak janak
2018, poesia
96 orrialde
978-84-17051-20-4
azala: Ainara Lasa Perez
Idurre Eskisabel Larraņaga
1970, Beasain
 
 

 

IKUSI

 

 

Ez, begiratu ongi,

ez naiz begitarte maskaldu hori,

makillajea

ezpain ertzeko erroitzean

erdoka,

adatsa errauts,

sorbaldak zama,

beso-zangoak korapilo,

urdaila garratz,

sabela lehor

 

Ez, ez dira nireak

helbidez okertzen ez diren urrats zehatzak,

praka beltzak, jertse beltza, beroki beltza

 

(eta beti arrastaka poltsa,

egunerokotasunera aingura:

karnet, diru, txartel, giltza, parazetamol,

kleenex, valeriana, begietako arkatz,

umeen toallatxo, kolpeentzako ukendu,

galleta, agenda, tirita, telefono...

bizimoduaren containerra)

 

Ez, ez,

begiratu ongi, ez dira nireak

ihesari iheska dabiltzan urrats neurtuak,

hitz zuhurrak,

keinu eutsiak,

ez dira nireak kalkulua eta antolaketa

 

Begiratu, begiratu ongi,

eta ikusi...

 

Ikusi nola nabilen oinutsik belarretan,

ez helburu eta ez helmuga,

nola amiltzen zaizkidan kizkurrak sorbaldan behera,

zeinen urtsuak ditudan ezpainak,

jostariak begiak,

biribilak bularrak,

hegalariak eskuak,

iheslariak oinak

 

Ikusi nola bustitzen zaidan soineko zuria olatuetan

axolagabe,

nola kresalak marrazten didan azal goria

pinporta zuriz,

nola egoten naizen inurriei begira,

sugandilekin etzanda eguzkitan,

nola jaten ditudan masustak eta pikuak,

nola lehertzen naizen algara malkotan,

nola esku hutsik noan

 

Ikusi,

ikusi nola kantatzen ditudan erraietako doinuak

arbolen gerizpeetan,

haitz muturretan,

taberna zaharretan,

eta nola aterpetzen ditudan

naufrago alderraiak nire magalean

(hara, lur usaina du nire izerdiak)

 

Ikusi,

ikusi nola ez dudan beldurrik...

 

Ikusi...