ERABAKIA
a, sarearen zarata!
saltegiko sarearen zarata!
sarearen zarata saltegia zarratzean!
husten dira bulegoak
betetzen dira autobusak
ez dabil inor karriketan
helikopteroak ere erretiratu egin dira
ilargiak salatuta
a, sarearen zarata!
saltegiko sarearen zarata!
sarearen zarata saltegia zarratzean!
bizitzen hasteko tenorea da
esaten digute saltegiko sareek
gillotina bezala jaisten direnean
gure burua
beti lehengo lepotik eduki ez dezagun
a, sarearen zarata!
saltegiko sarearen zarata!
sarearen zarata saltegia zarratzean!
sua eskatuko diot
aurrena topatuko dudan oinezkoari
ez dut erretzen
baina bizitzen hasteko tenorea da
besteren lepotik
a, sarearen zarata!
ordua ere kenduko diot
2005
© Koldo Izagirre