TOLOSA

hor dator naro garona

malenkonia sakona

zeinen gerizpe eztia zaidan

carriera zaharrona

capitoleko arkupe

egunonak musutruke

kafea hotza solasa bero

artistek bilera dute

ez badira bizikletan

gazteak pozik hizketan

mundu hobe bat sortu beharrez

beti elkar heziketan

saint serninen gaur feria

asteroko lanteria

liburu jantzi gazta odolki

laketzeko bezeria

arnaud-bernard larrainean

zabor kartoien gainean

dolce&gabanna luxury uhalak

laurdenaren ordainean

oc berbak noiz du uztaro

esperoan da luzaro

ô mon païs hasperen eginik

paristarra da nougaro

azalak zor du mamia

hau ez da okzitania

felibre jaunen lore jokoek

urri zuten legamia

trobador eta trobairitz

ai erdi aroan banintz

haien kantua ikasi eta

koplatzearren zenbait hitz

zabaldegiak ipuru

haxeleemen inguru

zalantza egin lezake batek

tolosa den hiriburu

zentrotik urrun zitea

ardura beltz albistea

berezkoa du bazterkeriak

noiztenka sua piztea

hiru mila ukamilo

arte sozio eta filo

faketako ikasleak gogor

askatzen bost korapilo

anarkismoa lubaki

gizon xaharrok temati

urtetxo batzuk kendu ezkero

lirateke berriz maki

adreilu hiri arrosa

tolosak hala du hotsa

askatasuna gaintzat hartzeko

hemen ez da inor lotsa