DRAMATIS PERSONAE

erromatarren hilarrietan

euskal hitzak zizelkatu zituzten harginak

hitz haiek ezabarazi ez zituen prokonsula

harginak kontratatu zituen bitartekaria

harriak erosi zituzten ahaideak

harrobitik atera zituzten peoiak

harrobiaren jabea

historia liburu zaharretan

bitxikerien adibide ageri diren

balada zatitxoen egile ziren

ahaide nagusien hilobi zuloan

mendekuzko deitoreak egin zizkiguten

emazte eta alaba haiek

bitxikeriatzat betikotu zituzten historialariak

historialariei kantatu zizkieten herritarrak

herritarren artean hedatu zituzten kantariak

gogoan hartu zituzten hilerrikoak

jaun kondeak hilarazi zuen gaztearen

hiru dozena atorrak

haiek garbitzen andozeko ibarrean erotu zen ama

jaun konde hiltzailea

biktima bera, izenez bereterretxe

bostehun urte geroago

hilketa diskoan grabatu zuen artista

grabaketa etxeko soinu teknikaria

diskoa salgai jarri zuena diskoa erosi zutenak

haragia emazteen fabore laketu zuenik

ezin ziurta genezakeen

gure lehen liburua

inprimategia sortu zenetik ehun urtera

idatzi zuen apaiza

bordeleko moldiztegiko langileak

ezagutzen den ale bakarra gorde duten

pariseko bibliothèque nationaleko zuzendariak

haren faksimila publikatu zuen

euskarofilo integrista espainiazalea

haren metrika aztertu zuen jesuita

jalgi hadi plazara kantatzen dutenak

eredu frantsesak imitatzen zituen

abokatu eta jakintsu libre zuberotarra

haren poemak aztertu zituen etaren sortzailea

aitak behartu zion emaztearen amorantea

akabatu nahirik tiroa erratu eta

adiskide baten erailea bihurtu zen

bere euskalkikoak ez garenok

zerbitzu filologikoetara behartzen gaituen

etxe oneko alproja

balada bat eskaini zion adelbert von chamisso

balada hura euskaratu zuena, nafarra hain zuzen

bertsoak bildu zizkion euskaltzainburua

ahoz aho heldu zaizkigun bertso sail zatiak

eman dizkiguten hatsa presondegian eman zuten

anonimo franko

bertsoak kartzelatik atera zituzten mugalariak

presoen idatziak irakurtzen dituztenak

ahalegin tamalgarriak egin zituen

abade samalda bat

idazten utzi zieten nihil obstat emaileak

euskararen gramatika irakatsi zieten abadeak

ahalegin txalogarriak egin zituen

beste samalda bat abadekondo

marxismoaren oinarriak

multikopiatzen zituzten apezgaiak

apezgaiak liluratu zituzten neskak

lurra belzterainoko analfabeto sailak

analfabetoak behar zituzten ilustratu ongileak

gosetuen matxinada zanpatu zuten

ongileon morroiak

gosetuak matxinadara sustatu zituzten

buruberoak gosetuak berak

gai honetaz ikertu dutenak

gai honen zurrunbiloan nobela idazten ari dena

gitarra batekin bertso txar kantagarriak

kantarazi zizkigun bohemioa

gitarra hura gorde zuen udala

gernikako batzar etxera eraman zuen agintaria

sorterriko plazan daukan monumentua

kentzen ez duten udalbatzak

argentinan askatasuna aurkitu zuen bertsolaria

buenos aireseraino eraman zuen

pakeboteko kapitaina

pampan ibili zuen zaldia

itzala eman zion ombua

haren izena ahoa betean ibili duten bertsolariak

ehun urte geroago

bertsoak zentsuratu zizkion telebista

horrelakoak ditugu gatazkaren protagonistak

lirika mengel maitagarria egin zuen gerentea

biziarenak gazterik eramana

katolikoek fusilatu bat

katoliko hezurretarainokoa

guatemalan mistiko ibili zen moralista hura

emigrante espainiarren premia espiritualak arintzen

suitzan hildako poeta amorratu abertzalea

parisen euskalduna izan zen suizida filonazi bakartua

harria probokatu nahi zuen kontadorea, hau ere gazterik

horrelakoak

eta ovidioz edo virgilioz galde egiten diguten guztiak