BERTSIO HOBETUA

Garbi Ramosek Txagorritxuko sendategiko

gaueko merkataritzan ezagutu zuen Aritz Zabala.

Garbi Ramosek ipuin bat osatzeko

ezaugarri egokia topatu zuen Aritz Zabalarengan.

Aritz Zabalari zupada batzuk egingo zizkion

aho aproposa iruditu zitzaion Garbi Ramosena.

Etxarri-Aranatzeko tren geltokira heldu aurrez

ardiak ikustean, Aritz Zabalak Garbi Ramosi

«Badakizu nolakoa naizen» esaldiaren bertsio hobetua

jaurti zion: «Bazenekien nolakoa naizen».

Sikiera «Bazenekien nolakoa nintzen» esan izan balio

Garbi Ramosek aukera izango zukeen hura aldatzeko,

edo horretarako aukera historikoa sortzeko.

Garbi Ramosek ez du egoarekin ezer aldarrikatzen,

ezer konpondu nahi ez duelako. Ramosek Zabalarekin

batasun zorrotza eratu nahi zuen, mina ulertzeko tresna

izan zedila Zabala-Ramos unitatea, plazera ekoiztu

eta mantentzeko heldutasun etenkaria izan zezala.

Zabala-Ramos unitateak Zabala independentearen

bertsio hobetua, argudiatua, minik gabekoa

eraikitzeko balio izan zuen soilik. Amak elikagaia

igortzen jarraitu zuen zilbor-heste ebakitik.

Zabala bere alboan gelditzera behartu nahi luke

Zabalak Ramos beltza dela ikusteko gaitasuna balu.