KALKULAGAILUA

Primarioa da Garbi Ramosen zenbakiekiko

gorrotoa. Trakets egiten duen horretan

aritzea ez du gogoko, ulertzen ez duenari

gaizki iritzi eta kontra egiten dio gogor.

Zapatu goiz batez ulertarazi zion

Aritz Zabalak Garbi Ramosi

zergatik zitzaizkion batuketak

eta kenketak horren nardagarriak.

Ariketez neurtua zuen Aritz Zabalak

Garbi Ramos: «ez nahikoa», «4.000 km»

«goizeko 9etatik arratseko 18etara».

Baina Aritz Zabalak ez du aritmetika hori

lan-indarraz mintzatzeko erabiltzen.

Koldarkeria posibilistatik aztertu du

Garbi Ramosek binomioa, ez zaizkio

kontuak atera. Baiki, Garbi Ramosi

otu zaio maitasuna distantziaz eta

gorotzez inguraturik dela maitasun.

Aritz Zabalaren ondeste blindatua,

limoizko ezpaina, du Garbi Ramosek

gogoan. Bakarka bizi duen lotsa une honetan

ere ez zaio joan txantxa desegokiak egiteko

irrika. Izarak zikinduko ditu Garbi Ramosek.

Aldi batez Garbi Ramosek berak sortutakoak

beteko du Aritz Zabalaren hutsartea.

Damnatio memoriae.