PSIKOLOGOA ETA POETA ETA PERTUR

Ogitartekoetan camembertari azala kentzen

ez dioten Hendaiako bistro batetik irten da

Amaia Martinez eta bere kolkorako esan du:

«Zergatik idazten ditut oharrak liburuetan?

Zergatik azpimarratu? Hobe analizatzeko

edo egoa gorago kokatzeko egiten dut?

Autore handien lanetan paratzen dut arkatza.

Zer adierazi nahi ote du jokaera honek?».

Amaia Martinezek hauxe hautatu du orain:

  |

  |  Voilà deux numéros du Nouveau Monde de 1948.

  |  Dans le numéro deux, j'ai publié un article, «Le

  |  réalisme socialiste et l'époque actuelle». C'est le

  |  premier article sur le réalisme socialiste. Hé, hé !

  |  On peut dire que c'est moi qui l'ai introduit dans

  |  notre pays, dit-il avec un gros rire qui s'efforçait

  |  de donner à ses paroles une couleur de plaisanterie.

  |

Alboan marra bat egin du eta

marraren gainean idatzi du: «Adanismoa».

Amaia Martinezek egunkaria erosi du

tren-geltokiko kioskoan. Otu zaio:

«Gaixoa kroniko bilakatuko duen

sendagaia eman dio Psikologoak.

Eta malerus kroniko egingo duen

zaborra idatziko du Poetak».

Amaia Martinez poeta bat irakurtzen ari da,

baina poetaren liburua nobela bat da.

Eta honela jarraitu du Amaia Martinezek:

«Psikologoa eta Poeta, biak dira tranpatiak.

Euren jokoaren arauak asmatu dituzte

baina poeta ez da hilaren amaierara helduko

eta psikologoak xanpainaz poteatuko du

Irungo kaleetan, heroi-martiri bihurtu aurretik».

Amaia Martinez etxean sartu da.

Haritz Ansorenak abisatu dio:

«Purea dago». Hotz dago purea.

«Berdin da» pentsatu du Amaia Martinezek

eta ordenagailu aurrean eserita jan du,

liburuko pasarte hautatua kopiatu bitartean.

Ehun eta seigarren orrian jartzen du:

  |

  |  Demkë pense que, même ici, au milieu de la fête,

  |  je suis son chef. Ici nous sommes tous égaux.

  |  Nous n'avons ni chefs ni supérieurs. Moi, même

  |  dans le travail, je n'écrase pas les gens, je les

  |  laisse créer, je respecte leur pensée. Toi, Demkë,

  |  tu as dans l'idée de boire, montre-le.

  |

Alboan marra bat egin du eta

marraren gainean idatzi du:

«Populismo kastratzailea,

inauteriaren gezurra».

Amaia Martinez ez dago ondo.

Konturatuta baitago jakintza

tresna bereganatzea dela

eta ez pasartea kontrolpean izatea.

Ordenagailuko artxibategi batean

giltza-hitzen bidez gorde du

bere armategiko pasarte oro.

Purea goxoago dago hotz.

Amaia Martinez azkenean

zalantza egiten hasi da

memoria arazoak dituen edo ez.