GAURKO AFARIA

                Langileak, bakarka, nire atsegin guztia du.

                Ez dagokion horretan parte hartu eta matxinatzen

                denean, ordea, esaten diot: geldi hor, anai-arreba,

                ez duzu arrazoirik. Langilea zara, beraz lanera.

                Greban bazaude eta lanik ez baduzu egiten,

                jada ez zara langilea, tipo arriskutsu bat baizik.

                                                                        Arturo Ui

Bada jendea uste duena hondamendia dela

eta(m)ren ekintza armatuak bukatu izana

bizkartzainak langabeziara joanen direlako.

Frantzian 1946an Poloniarako eremuetara

zihoazen tren-gidarien desagerpenak langabezia

igoko zuelako kezkatu zen jende bera da.

Bada jendea kexatu dena ehun irakasleek

tutoretza orduetan inbertitzen duten denbora

neurtzeko sistema instalatu dutelako.

Duela lau urte atezain, informatikari eta

fakultateko langile teknikoentzat sistema bera

instalatu zutenean kexatu ez zen jende bera da.

Bada jende diruduna egunkarietako zutabeetan

beheko klasearentzat idazten duela dioena.

1872an Eskoziako oihal-fabriketako umeei

gauez zopa ematen zien jende bera da

—egunez goikoentzat jertseak egiten

hil ez zitezen elikatzen zituzten—.

Bada jendea sumintzen dena eta(m)k

Benjamin Atutxa jaun sozialdemokrata erail

nahi omen zuelako. Benjamin Atutxak

enpresa pribatuak sustatu behar direla,

funtzionarioen kopurua gutxitu behar dela

eta de facto milaka langile euskaldunen

bizitza itxaropena hamar urte jaitsi behar dela

dioenean txalotzen duen ia jende bera da.

«Murrizketak egin behar dira» esan du

Benjamin Atutxak. Eta gero jarraian:

«Abiadura Handiko Trena egin behar da».

Txalo egin dio trenaz baliatuko den jendeak.

Herritarren ehuneko laurogeita hemeretziak

ezingo duela erabili dakien jende bera da.

Bada jendea egongelako leihoa ixten duena

kalean grebalariek, langabeek edo prekarioek

txistu eta karranka egiten dutelako

kontsignak eta exijentziak aldarrikatzen.

Eta egongelako jendeak pentsatzen du

«astunak» edo «betikoak» direla.

Ostiraletan, larunbatetan eta igandeetan

jatetxe eta dantzalekuak garrasi hanpatuekin

leporaino betetzen dituen jende bera da.

Horixe da gaurko afarira etorriko ez den jendea,

ordurako ahoa belarrez beteta izango duelako

Marcelino Orejak izan zuen bezala.