GAUZEN IZENAK

(Paradisuko paisaia Jainkoarekin
Adami animalien izenak irakasten,

Jan Brueghel Zaharra, 1594,
Palazzo Doria-Pamphili, Erroma)

Lanbro gisako batean bildu ditu

marrazteko zailenak zaizkion piztiak

—enkarguak ez dira galtzekoak—,

baina zehatzak dira izaki guztiak

Brueghel Zaharraren koadroan:

paradisua irudikatu du.

Adam eta jainkoa bazterrean

detaile bat besterik ez dira, eta

koadroaren tituluari kasu egitera,

gauzek ezarri gabe dituzte izenak:

oraindik ihesi dabil edertasuna

giza gogoaren kaioletatik.

Otzana dirudi denak.

Baina pintoreak —berak badaki—

lehen lerroko lehoien bidez

gaztigatu nahi gaitu

nola dagoen mundua

hain sortu berri oraindik

eta jadanik hain zain

bere horrore guztiak

guganaino noiz hedatuko.