POETEN JATORRIA

Historiaren apetez mintzo zaizkit

maite ditudan poeten jaioterriak.

Lviv, gaur egun Ukraina.

Adierazten didate

lurrak izen aldaketa bakoitzean

eskatu ohi duela bere odol zerga.

Strumica, gaur egun Ipar Mazedonia.

Laino artean paseatuak dira batzuk

judutarren hilerri bihurgunetsuetan

eta ikasia dute horrorearen hiztegia.

Praga, gaur egun Txekia.

Bidaia erdian inork galdetu die

ea hori al zen autobusa.

Haiek erantzun dute bai

baina esan nahi zuten ez dakit.

Bagdadi, gaur egun Georgia.

Pista bila irakurtzen ditut,

baina ezerk ez du iradokitzen

sasoi lasaiagoak etorriko direnik.

Trieste, gaur egun Italia.

Badakit Chopinen Nokturno-etan

bilatu dutela haiek aurrez

nik orain bilatzen dudana.

Szetejnie, gaur egun Lituania.

Baina hemen eguna da oraindik eta

leihotik datorren trafiko hotsarekin

nahasten utzi ditut orkestraren notak.