EDP

Nik badakit:

ez dira jainkoak izan.

Ekoizpen herrialde batean

langile batek

segundo batez

arreta galdu du zintan.

Mikrotxipak begiztatzen ditu

eta bat eskapatu zaio,

horregatik gelditu gara gaur

dutxatzeko ur berorik gabe.

Eltzea sutan jarrita

berriz ikasi dugu

gauzen denbora.

Bitartean zu

biluzik zaude bainugelan,

ni ur epelarekin noiz agertuko.

“Beren lanen dohainaz saritu naute”.

Safo. Orain etorri zait.

Nik badakit ez direla jainkoak izan,

baina edalontziz edalontzi goaz

antzinakoen erronka bererantz:

nola deskribatu zorion une hau?