PROMESA

(Mutikoak hondartzan, Joaquin Sorolla,

1910, Museo del Prado, Madril)

Pintura historikoei atondutako

aretoen izkina batetik

zeharka soilik ageri dira

hiru mutiko uda beteko hondartzan

eguzkitara biluzik etzanda,

zorion hutsezko irribarrez.

Urdinkara eta gorrizta da

euren mundua han.

Iraganik eta izurik gabe

aurrez aurre begiratzen diote itsasoari

eta nigan berritzen dute

sasoi lasaiagoen promesa,

artean urruna dirudien

beren argi puruko galeriatik.

Oraindik okela zakuak bezala

erortzen dira gorpuak hemen.

Fusilamenduei eta liburutegien

asperduran hildako erregeei

iskin eginez topatu behar du

haienganainoko bidea begiak,

epela eta erraza nahi lukeen

etorkizun baten egarriz.