Zure azal lehorraren gatza ezagutzen dut

uda haragiaren negu bilakatu ondoren

gaueko izerdian atsedena hartzen.

Edaten dugun esnearen gatza ezagutzen dut

ahoetan ezpainak estutzen zirenean

eta bihotza sexuan taupadaka zebilenean

Zure ile beltzen gatza ezagutzen dut

edo horailena edo urdinduena kiribilduta

distira urdinxkak dituen loaldi honetan.

Eskuetan geratzen zaidan gatza ezagutzen dut

kresala hondartzetan pausatzen den bezala

itsasoak jaitsi eta atzera egiten duenean.

Zure ahoaren gatza ezagutzen dut,

zure mihiaren gatza, zure titiburuen gatza

eta gerriarena aldaketan biribilduta.

Ezagutzen dudan gatz guztia zurea da,

edo nirea zugan, edo zurea nigan,

maitale elkar lotuen hauts kristalezkoa.

Madril, 1973/1/16