NUKLEARRA

diren guztiak egin ondoren

zazpigarren egunean

Jainkoak atseden hartu zuela ikasi genuen

ortziaren erdian begi handi bat lo utzita

diren zentral guztiek dauzkate zeinek bere historia

bere istripuak bere ahuldadeak eta argi aldiak

latentzia fase luzeak ere izaten dira

urteak eta urteak sentimendu edo ekintza bat umotzen

uste dut indarrean geure baitaren mugetan

eta gure itzalaren irismen eremuan

denbora asko emanak garela

(larba egoeran zelula karraskariak)

nonahi igartzen da desmuntatze aro bat dela ate joka

zenbait oihartzun eta hondakinek asko iraun dezake

arriskutsu izan ahal dira desaktibatze lanak

eta desegite prozesua larregi atzenduz gero

ez da inor geratuko barrutik ondo ezagutzen dituenik

(inori oinordetzan laga historia pozoitu bat)

epeekin asmatzea garrantzitsua da

ahitutako erregaiak bereiztea azpiegiturak deseraikitzea

hormigoizko sarkofago batean sartzea gune kutsatuenak

(santutegi baten ernamuin eta atalase)

gaitza izango da desestalitako begi zulo hutsetara so egitea

irudikatu orain zeruetako erresuman lekuak husten

Grünenthalen seme tuer bat astebeteko oporrekin