KAPITULAZIOA

amore ematen dut

kapitulazioak itzuliko didalakoan

abangoardian galdutako arnasa

hizkuntza naiz

bere traizio guztien

posibilitateak

mintza nazaten nahi dut

edo ahaztu nazatela behingoz

izan nadin jendeak nahi duena

baino zerbait gehiago

nola geldiarazten ote da bizitza

ez bada bizitzari bide emanez

erregresio bakarra ez da heriotza

sinesten al duzu badela

ustekabean ezkutuan

gidatzen gaituen beldurrik

grinak eta minak

azaltzeko balio duen

gertakari lazgarri bat

nola begiratzen ote da

ingurukoen barnera

bertan betiko galdu gabe gainera

behin eguzkitan erreta

ba al dago itzaletara

itzultzeko modurik

alderantzizko bideak

eramango al nau

inora