HIRIAK IRAUTEN DU

         Parisen norbait aurkitzea

         patuan sinestea bezain

         ezinezkoa da, esan du, berriz,

         emakumeak.

                                 Ixiar Rozas

beharbada horregatik

ezinezkotasun horri esker

nabil berriro karrika luzeotan

intermitentzia pausatu

eta aire zikina arnasten

beharbada horregatik

patuan ez dudalako sinesten edo

etorkizuna gaur-gaurkoaren

luzapena baino askoz gehiago ez delako

bizitza bukatu baina

hiriak denboran irauten duelako

errautsek estalita ito eta erreta edo

urak hartuta ito eta gorpu guztiak puztuta

ingelesen sua beltz

hareharrizko etxe eta balkoietan

aurkitu beharreko guztiak ustelduta

hiriak irauten duelako