Kapital publikoa
Kapital publikoa
2014, poesia
104 orrialde
978-84-92468-64-5
azala: Xabier Gantzarain
Jose Luis Otamendi
1959, Azpeitia
 
2022, poesia
2019, poesia
2007, poesia
2000, poesia
1999, narrazioak
1995, poesia
1990, poesia
1987, poesia
 

 

KONTRAERAN

 

ezetz dioten arren baietzean nago

ez da berdina maitasunak

ilunabar izoztuetan edo

gaugiro ederrarekin harrapatzea

ezbeharrek ez dute berdin tratatzen

jende ondo-bizia eta behartsua

—soziologian aditua da zoritxarra—

antzik ez dauka abandonuak

bistrot bateko mahaian edo

harrera kai galarazietako aduanan...

nahiz bietan hezur gogorrekoa izan

gaixotasunak berdin kolpatzen du

erdalduna eta euskalduna

baina badago aldea hitzetan

 

ezetzarekin bat egin behar banu ere baietz diot

erdi aro ospel batera goazela pendizean behera

nago daukadana galtzeko beldurrak eragin dardara

eta soin adarren txindurritze hau

ez dela erreparo psikiko somatizatua

edo ideologia endekatu baten ondoriozko

kolesterol mailari dagokion marka baino...

nire baiezkoarekin miraturik

egoten natzaie labana ahoei so

nola abesten dizkieten lo kantak

hozkailuko oilasko papar zuhailei

eta istiluen aurkako poliziei ume jaio arren

koskortu arte ez zaiela antzematen

euren klasekoen aurka ekiteko sortu zirela

diost gogoak

 

ezetz burgoiari baiezko pikorrez jartzen natzaio

bada bustitasun itsaskorra

sabelpe gozoko biloetara bidean

eta justiziaren tentazio molde bat

zauri zornatuen galdaran...

ekaitzen seme-alabok borroka ere egin dugunez inoiz

ondo pagatua nago

merezi izan dute

zelula matxinatuen lekukotzek

merezi izan du

fusilatzeen atariko goizak

merezi izan du

hainbeste larderiak —eskola estatua etxea...—

eta anaiak anaia leihotik

behera bota nahi izan zuenekoak

merezi izan du

ondo pagatua nago

beti delako uda betea

inoren buruko hemisferioren batean