IRITSIKO DA EGUNA

iritsi da gure gaurko eguna

iritsi da gure gaurko aldia

suerteko eta zorioneko gara

eta orain laino mugan ikusi ahal den

bide zabal hori pagatu duten guztiekin zordun gara:

zubiak kaleak etxeak hor badaude

sukaldeak arropak kantuak hor badira

hango eta hemengo jende askok

gure aurretik horretan jardun duelako da

horregatik daukagu eskura

hainbeste ondare eta hainbeste ardura

hau da gure gaurko aldia

hau da gure gaurko eguna

eta lehen beste hainbatetan gertatu bezala

berriz ekibokatzen bagara

jendartearen seinaleak

kafe hondarrak

edo txorien hegaldiak

gaizki irakurtzen baditugu

agian azken aukera izango da

baina ez diogu beldurrik

beste behin erratu eta porrot egiteari

ezin baitugu

asmatzeko aukerarik txikiena joaten utzi

gaurko hau gure azken ekina gertatuko balitz ere

ezin baitugu irabazteko aukerarik galdu

iritsi da gure gaurko eguna

gure aldi da

honaino ekarri gaituzten

erabaki zuzen eta eskuzabalak ditugu begira

egin ditugun makur eta injustiziak:

hainbeste bazterketa bidegabe izan dira

hainbeste hildakoak eta arima hautsiak...

larri kolpatutako denbora batean bizi gara oraindik

larri zauritutako denbora batean

baina badakigu honek behar duela

garai berri baten atalasea eta hastapena

beharbada izango zen

orain gauden honetara lehenago ailegatzeko era

baina ez dugu jakin nola

berandu ibili ginen

eta ez genuen asmatu orduan

eta errakuntza eta aukera galdu horien guztien zama

bihotzean dakargula gatoz

iraganak eta geroak oinordetzan

laga diguten orain honekin:

orain hau baino ez daukagu...

eta azkena gerta badaiteke ere

ez diogu beldurrik beste porrot bati

izan ere hain dugu premia handia irabazteko

norbaitek noizbait zerbait irabaz dezan hemen

eta hain gertu dakusagu eskueran

aro hobeago baten aukera

elkar bana daitekeen aro baten aukera

inork inor sekula zapalduko ez duena...

egin diezaiogun gure gogoeta zintzoenaren promesa

egin diezaiogun gure ahalegin kezkatuenaren promesa

aldi hau pagatu duten guztien ohoreari

aldiro bizi izan dugun egokiera

izan da geneukan onena

geneukan bakarra

baina oraingo orain honek

aurrekoen aldean geroaz beteago

orain artekoek baino orainago dirudi

gure oraineko orainak gaur

eta ez dugu ekin gabe igarotzen utziko

hainbestekoa du herri honek irabazteko premia

hain karu pagatu du mendeetan

hain karu pagatzen da bizi garen munduetan...

iritsi da orain hau

hau da gure aldia

hauxe da gaur daukagun orain bakarra

egin dezagun gure gogoeta zintzoenaren promesa

egin dezagun gure ahalegin kezkatuenaren promesa

ez daukagu hondarrekoz galtzeko beldurrik

ez dugu irabazteko beldurrik

hemen norbaitek noizbait zerbait irabaz dezan

premia gorria baizik

gaur da gaur guztietan gaurkoena

orain da orain guztietan orainena

iritsi da gure gaurko eguna

iritsi da gure gaurko aldia

eta hala ere adiskideok

hala ere

iritsiko da eguna!