MAITE DUZUNA

ez dakizunean maite duzuna herri bat den

gizon bat

emakumea

edo ezinezko kantua

malko bat sumatzen baduzu

sumatzen duzu marrazo bat begi mintzetik behera

edo bare nekatu bat hosto bila

betiko ostentzeko kausa hobearen beharrik gabe

ez dakizunean maite duzuna kantu bat den

emakume bat

gizona

edo ezinezko etxea

eta aho gozo batean badabil marruskatutako ogia

itsaspeko bat periskopiotik

dorre aldika itoa bistatzen ari bada

edo marru ozen bat zeure izatearen eguerdi hautsian

ez dakizunean maite duzuna gizon bat den

emakume bat

kantua

edo ezinezko kalea

eta zeure tristura eztian batzarturik

txapliguek hatsarrea iragartzen duten

mende zoriontsu bat bada jenderik gabeko unibertsoan

bare nekatu bat etsi gabe doalako hosto bila

ez dakizunean benetan maite duzuna zer den

benetan ezer maite duzun ez badakizu edo

dena maite duzula esan daitekeen unetik gertu bazaude

gertaeren logika ezak lehertzen du zalantza oro

durduzamendu atzeman gaitzak datoz

eta pausoak beldurra poza inoren agenda lokabean