beltzez jantzita bi nagusienak

gerria fintzen zion soineko berde loratu harekin ama.

Nork esango zukeen bi umeren ama izango zinena

hasi da amama

erretilu barrura zeharka begira.

umeak pentsatu gabe ekarri behar zirela.

Ekarri eta kendu, gehitu du birramamak.

Olioa zabaldu dut azpilean,

berakatza xehatzen hasi naiz.

Gerra garaian pase librea eman zion honek zure aititari.

Elkarri eman genion —ihardetsi dio.

Isiltasuna osagai berri bihurtu da

plater eta edalontzi artean.

Honetarako etorri zarete nire ezkaratzera?

Zu ez zaitez hainbeste kexatu,

oraindik odola hilero datorkizu eta bisitan.

Gainera, ez zara gure aldean hain ezberdina.

Eta euren soslaiari begira geratu naiz

sudurraren bihurdurari, ertz lausotuei.

Begiak itxi eta

arraspan jarraitu dut aiztoarekin.

Sukaldeko oholean neure azaleko ezkatak.

Labea piztera joan naizenerako

desagertuak ziren hiru andreak.

Amua kentzen saiatu naiz.

Galdera marka zorrotzegia.