Nire magalean sukaldeko artaziak

beste norbaiten eskua balira bezala zabalik.

Tamaina berekoak

ez dudan zorroztasunez mozten duten

altzairuzko atzamarrak eta

kamustutako nire beste hauek.

Harri orri ar

jolasten hasi dira

itxi-zabaldu-itxi.

Urruneko ezagun bi nire ama eskuak.

Oroitzen al dute zenbat azal

zenbat orri ukitu duten?

Zenbat aire moztu?

Harri orri ar

ibaiadarrak ditut orain nire esku ahurretan

meandroak putzuak desertuak padurak.

Harri orri ar

konstelazioak zeruaren tolesturak adabakiak junturak.

Harri orri ar

sukalde zaharren usaina oilasko azalak arrain hezurrak.

Harri orri ar

txerak desioak damuak beldurrak.

Harri orri ar

artaziek zauritu dute orria;

atzamarrekin batera erori zaizkit

desioen zerrendak.