Umeen arropa armairuan laburtzen

lagunik gabeko galtzetinak nonahi.

Ez da samurra etxe bat jasotzea

geldirik egoten ez dakiten eskuak

eta haien atzetik doazen beste esku batzuk

etxe bakoitzeko historia

eguneroko objektuez idazten dabiltzalarik.

Premien su etena ikasi dugu.

Beldurraren zikintasuna ikasi dugu.

Baita imitazioz elkar maitatzen ere.

Etxe batek besoak zabaldu behar dizkizu

eta zuk estutu zaitzan utzi.

Bakea egin behar da norbere bizilekuarekin.

Gaur armairuak txukunduko ditut.

Umeen poltsikoetan

harriak eta adaxkak aurkitzea da

zoriona.