Luzaroan txitatutako arrautzaren hauskortasunaz

apurtu nintzen ekaineko egun hartan

zerua ere zartatu zen

udaberrian ohi ez duen legez.

Haize beltzak ospitaleko nire leihoaren kontra

erratz batek nola astintzen zituen zuhaitz adarrak

eta arabazozo bat ere jo zuen

hego zabal moko hautsi

espero ez nuen bisitaria.

Haren mina ukiezina zen

kantari entzuten nuen

leihoaren bestaldetik.

Nekez alde egin zuen hegan.

Puskatutako nire oskolak biltzen hasi nintzen

lurrera makurtuta

inoiz izan zuten taxua eman nahian

alferrik.

Egun hartatik aurrera

txori larregik egiten dute talka

nire gorputzeko beirekin.

Eta geratzen ote diren

begira geratzen naiz.