Oroitzen zaitut, ama,

arrosa koloreko plastikozko goanteekin

batako poltsikoetan goroldioa lez itsatsitako

mukizapi eta trapuekin

ilea sasi laharrez goizetan

begiak txori beltzez beterik.

Oroitzen zaitut, ama,

katuka behegainari distira ateratzen

garbigailuan burua sartzen

izarak gorputzaz tolesten.

Eta behin guraizeak eskuetan hartu

eta arrosegiak ziren plastikozko goante haiei

muturra moztu eta erpeei arnasa eman zien

animalia domestiko hura ere akorduan dut, ama.